கடல்நீரை குடிநீராக்கும் நிலையத்தை முதல்வர் ஜெயலலிதா இன்று திறந்து வைத்தார்.

சென்னை,பிப்.22 : நெம்மேலி அருகே கடல்நீரை குடிநீராக்கும் நிலையத்தை முதல்வர் ஜெயலலிதா இன்று திறந்து வைத்தார். இதன் மூலம் தினமும் 100 மில்லியன் லிட்டர் குடிநீர் வழங்கப்படும். காஞ்சிபுரம் மாவட்டம் கிழக்கு கடற்கரை சாலையில் நெம்மேலி அருகில் சூலேரிக்காட்டில் கடல் நீரை குடிநீராக்கும் நிலையம் மற்றும் நீரேற்று நிலையங்கள் சுமார் ரூ.871 கோடியில் அமைக்கப்பட்டு உள்ளது

. நகராட்சி நிர்வாகம் மற்றும் குடிநீர் வழங்கல் துறை சார்பில் சுமார் 40 ஏக்கர் பரப்பளவில் இந்த நிலையம் அமைக்கப்பட்டு இருக்கிறது. இங்கு தினமும் 265 மில்லியன் லிட்டர் கடல் நீர் எடுத்து,  அதை குடிநீராக சுத்திகரித்து 100 மில்லியன் லிட்டர் குடிநீர் ஆக்கப்படும். மீதமுள்ள 165 மில்லியன் லிட்டர் நீர் மீண்டும் கடலுக்குள் திருப்பி அனுப்பப்படும்.

இந்த கடல் நீரை குடிநீராக்கும் நிலையம் மற்றும் நீரேற்று நிலையங்களின் திறப்பு விழா இன்று காலை நடைபெற்றது. முதல்வர் ஜெயலலிதா புதிய திட்டங்களை தொடங்கி வைத்தார். நீரேற்று நிலையத்தை சுற்றி பார்த்தார். விழா 15 நிமிடம் நடைபெற்றது. மேடையில் அமருவதற்கு யாரும் இருக்கை போடவில்லை. நின்று கொண்டு இருந்த ஜெயலலிதாவுக்கு ஒரு நாற்காலி போட்டனர். ஆனால் அதில் அவர் உட்காரவில்லை. முன்னதாக நகராட்சி நிர்வாகம் மற்றும் குடிநீர் வழங்கல் துறை செயலாளர் பனீந்திர ரெட்டி வரவேற்று பேசினார்.

இங்கு பெறப்படும் 100 மில்லியன் லிட்டர் குடிநீர் சென்னை பகுதியில் உள்ள வேளச்சேரி, திருவான்மியூர், பழைய மகாபலிபுரம் சாலையில் அமைந்துள்ள தகவல் தொடர்பு நிறுவனங்கள் உள்ளிட்ட 10 லட்சம் மக்கள் பயன்பாட்டுக்கு வழங்கப்படும். விழாவுக்கு வந்த முதல்வர் ஜெயலலிதாவை உள்ளாட்சி துறை அமைச்சர் முனுசாமி பூங்கொத்து கொடுத்து வரவேற்றார்.

விழாவில் ஓ.பன்னீர்செல்வம் உள்ளிட்ட அமைச்சர்கள், சென்னை மாநகராட்சி மேயர் சைதை துரைசாமி, எம்பிக்கள், எம்எல்ஏக்கள், அதிமுக பிரமுகர்கள் கலந்து கொண்டனர். சென்னை பெருநகர் குடிநீர் வழங்கல் மற்றும் கழிவுநீர் அகற்று வாரிய மேலாண்மை இயக்குனர் சந்திரமோகன் நன்றி கூறினார். விழாவையொட்டி கிழக்கு கடற்கரை சாலையில் பலத்த பாதுகாப்பு போடப்பட்டு இருந்தது.

Read More

தமிழகழகத்தின் பாதுகாப்புபற்றி அதிகாரிகளுடன் முதல்வர் ஜெ. ஆலோசனை

 
சென்னை,பிப்.22 : ஹைதராபாத்தில் நடந்த தொடர் குண்டுவெடிப்புச் சம்பவத்தைத் தொடர்ந்து தமிழகத்தின் பாதுகாப்பு நிலவரம் குறித்து முதல்வர் ஜெயலலிதா இன்று அதிகாரிகளுடன் ஆலோசனை நடத்தினார்.

ஹைதராபாத் நகரில் நேற்று தொடர் குண்டுவெடிப்புச் சம்பவம் நடந்து நாட்டையே பரபர்பில் ஆழ்த்தியது. இதில் 14 பேர் உயிரிழந்தனர்.

இதையடுத்து நாடு முழுவதும் முக்கிய நகரங்களில் பாதுகாப்பு பலப்படுத்தப்பட்டுள்ளது. அந்த வரிசையில் தமிழகத்திலும் சென்னை உள்ளிட்ட முக்கிய நகரங்களில் பாதுகாப்பு பலப்படுத்தப்பட்டுள்ளது. இந்த நிலையில் முதல்வர் ஜெயலலிதா தலைமையில் இன்று சென்னையில் உயர் அதிகாரிகள் கூட்டம் கூட்டப்பட்டது.

தலைமைச் செயலகத்தில் நடந்த இந்தக் கூட்டத்தில் தமிழகத்தில் பாதுகாப்பு நடவடிக்கைகள் குறித்து முதல்வர் ஜெயலலிதா கேட்டறிந்தார்.

Read More

பாலசந்திரன் சுட்டுக் கொல்லப்பட்டது மன்னிக்க முடியாத போர்க்குற்றம்! இலங்கையில் ஹிட்லர் ஆட்சி!- ஜெயலலிதா

விடுதலைப் புலிகளின் தலைவர் பிரபாகரனின் 12 வயது மகன் பாலசந்திரன் இலங்கை இராணுவத்தால் ஈவு இரக்கமின்றி சுட்டுக் கொல்லப்பட்டது, மன்னிக்க முடியாத மாபெரும் போர்க் குற்றமாகும் என்று தமிழக முதல்வர் ஜெயலலிதா கண்டனம் தெரிவித்துள்ளார்.

மேலும் இலங்கையில் நடைபெற்றது திட்டமிட்ட இனப்படுகொலை என்றும், அங்கு ஹிட்லர் ஆட்சி நடைபெறுவதாகவும், இப்பிரச்சினையை ஐ.நா.வுக்கு இந்தியா கொண்டு செல்ல வேண்டும் என்றும், இலங்கை மீது பொருளாதார தடை விதிக்க வேண்டும் என்றும்  ஜெயலலிதா கூறியுள்ளார்.

சென்னையில் இன்று நிருபர்களிடம் பேசிய அவர்,

சிறுவன் பாலச்சந்திரன் இலங்கை இராணுவத்தால் ஈவு இரக்கமின்றி சுட்டுக் கொல்லப்பட்டதற்கு எனது கடும் கண்டனத்தைத் தெரிவித்துக் கொள்கிறேன். இது கொஞ்சம் கூட மனிதாபிமானமற்ற செயல்.

ஜெர்மனியில் ஹிட்லரின் ஆட்சியில் நடந்தது தான் நினைவுக்கு வருகிறது. ஹிட்லர் ஆட்சியில் யூதர்கள் இன்ப படுகொலை செய்யப்பட்டனர்.

அதேபோல இன்றைய இலங்கை அரசு தமிழர்களை வேட்டையாடி கொன்று குவித்து வருகிறது.

இதை கருத்தில் கொண்டு மத்திய அரசு, அமெரிக்காவுடனும் இன்னும் ஒத்த கருத்துடைய நாடுகளுடனும் கலந்து பேசி, இலங்கையில் நடந்த இனப் படுகொலை தொடர்பாக ஐ.நாவில் தீர்மானம் கொண்டு வர வேண்டும். அமெரிக்காவுடன் இணைந்து இலங்கை மீது சர்வதேச பொருளாதாரத் தடையைக் கொண்டு வர வேண்டும்.

இலங்கையில் இடம் பெயர்ந்து முகாம்களில் வைக்கப்பட்டுள்ள தமிழர்கள் தங்களது சொந்த இடங்களில் வாழ அனுமதிக்கப்படும் வரை, அவர்கள் சிங்களவர்களுக்கு இணையாக மரியாதையுடன் வாழும் வரை இந்தப் பொருளாதாரத் தடை நீடிக்க வேண்டும்.

சிறுவன் பாலச்சந்திரன் கொல்லப்பட்டது மன்னிக்கவே முடியாத போர்க் குற்றமாகும்.

இது தொடர்பாக இலங்கை அரசு மீது போர்க்குற்ற விசாரணை நடத்தச் செய்ய சர்வதேச நாடுகளுடன் இணைந்து மத்திய அரசு நடவடிக்கை எடுக்க வேண்டும் என்றார் ஜெயலலிதா.

Read More